Меню

 /1915-1986/. Дундговь аймгийн Эрдэнэдалай сум. Говь-Алтай аймгийн авто тээврийн VII баазын жолооч байхдаа Монгол Улсын Хөдөлмөрийн баатар /1958-11-15. №159/.
Орон нутагтаа 19 настай болтлоо мал маллаж байгаад 1934 онд Улаанбаатар хотод очиж авто тээврийн 2 дугаар баазад аккумуляторчны дагалдангаар ажилд орж, 1936 оноос авто тээврийн 1, 2, 5 дугаар бааз, Тээврийн яаманд, 1951 оноос Говь-Алтай аймгийн VII баазад слесарь, механикч, жолоочоор ажилласан байна. 1951 онд хүлээн авсан шатахуун тээврийн “ЗиС-5” маркийн машинаараа 1952 онд 100 мянга, 1954 онд 200 мянга, 1955 онд 300 мянга, 1957 онд 400 мянга, 1958 оны эхний 10 сард 500 мянган км-т хүргэж явахдаа 6 удаагийн их засварыг хэмнэжээ. Резин дугуй, бензинээс 99904 төгрөгийн хэмнэлт гаргасан байна. Энэ нь тухайн үнийн ханшаар “Газ-51” маркийн машин 9-ийг юм уу хоёрдугаар зэргийн гурил 99904 кг-ийг худалдаж авахуйц хэмнэлт ажээ. Ардын Их Хурлын депутатаар сонгогдож, МАХН-ын их хуралд төлөөлөгчөөр оролцож, Намын Төв Хорооны орлогч гишүүнээр сонгогдож байжээ. Сүхбаатарын одонгоор 2 удаа, медалиудаар шагнагджээ.