Меню

/1944-1996/. Увс аймгийн Зүүнговь сум. Увс аймгийн Баруунтурууны сангийн аж ахуйн тракторч-комбайнч байхдаа Монгол Улсын Хөдөлмөрийн баатар /1971-07-02. №133/.
1958-1959 онд тракторч-комбайнчийн дамжаанд суралцаж механикжуулагч, 1976-1981 онд ХААДС-д суралцаж инженер механикч мэргэжилтэй болжээ. 1959-1991 онд Увс аймгийн Баруунтурууны сангийн аж ахуйд тракторч-комбайнч, шалгагч инженер, ерөнхий инженер, 1991-1992 онд мөн аймгийн Гурил тэжээлийн үйлдвэрт ерөнхий инженер, 1992-1995 онд Баруунтуруун сумын “Цэнхэр мандал” ХК-ийн ерөнхий захирал, 1995 оноос “Алтан түрүү” ХЭАА-н эзнээр ажиллаж байжээ. Тракторч-комбайнчаар ажилласан 22 жилд тогтвортой амжилт гаргаж, 1964-1971 оны найман жилд 2040 га-гийн ажил хийх норм төлөвлөгөөгөө шууд хураалтад шилжүүлснээр 5059 га-д хүргэж, жил бүрийн нормыг 138-376 хувь биелүүлж, 20 жил  9 сарын ажил хийж, IV таван жилд шатахуун, сэлбэг хэрэгслээс 42,4 мянган төгрөгийн хэмнэлт гаргаж, ургац хураалтын улсын 5 удаагийн аваргаар шалгарч, хөдөлмөрийн гарамгай амжилт гаргажээ. Ардын Их Хурлын депутатаар сонгогдож, МҮЭ, МХЗЭ-ийн их хурлуудад төлөөлөгчөөр оролцож, МХЗЭ-ийн Төв хорооны гишүүнээр сонгогдож байжээ. Сүхбаатарын одон, Ардын хувьсгалын ойн хүндэт медалиудаар шагнагджээ. Мөн Намын Төв Хороо, Сайд нарын Зөвлөлийн мөнгөн шагналаар 1962  онд шагнагдсан байна.