Меню

/1916-1987/. Завхан аймгийн Цэцэн-Уул сум. Завхан аймгийн Улиастай хотын нэгдүгээр бага сургуулийн эрхлэгч байхдаа Монгол Улсын Хөдөлмөрийн баатар /1975-08-19. №171/, Гавьяат багш /1967-02-03. №22/.
    Гэрийн сургалтаар бичиг үсэг сурч хошууны тал бичээчээр хөдөлмөрийн гараагаа эхэлжээ. 1930 онд Завхан аймгийн Түдэвтэй, Завханмандал суманд соёлын довтолгооны багшаар ажиллаж, 1932 онд Улиастай дахь аж ахуйн сургуульд, 1934-1937 онд Улаанбаатарт Багшийн сургуульд суралцаж төгсгөжээ. 1937 онд Улаанбаатар хотын үлгэр жишээ бага сургуульд багш болж улмаар Завхан аймгийн ерөнхий боловсролын сургуулиудад багш, захирлаар 40 гаруй жил ажиллаж ард түмний үр хүүхдийг сургаж хүмүүжүүлэх, ард түмнийг соёлжуулан гэгээрүүлэх, боловсролын байгууллагыг хөгжүүлж бэхжүүлэх, багш боловсон хүчнийг ажилд нь сургаж дадлагажуулахад олон жилийн мэдлэг, туршлага, хүч зүтгэлээ зориулсан нэрт сурган хүмүүжүүлэгч байжээ. Ардын Их Хурлын депутатаар сонгогдож, Монголын багш нарын 2, 3, 4 дүгээр их хуралд төлөөлөгчөөр оролцсон байна. Сүхбаатарын одон, Хөдөлмөрийн гавьяаны улаан тугийн одон, “Алтан гадас” одон, медалиудаар шагнагджээ.