Меню

/1925-1978/. Дундговь аймгийн Сайхан-Овоо сум. Төвийн эрчим хүчний нэгдсэн засварын газрын засварчин байхдаа Монгол Улсын Хөдөлмөрийн баатар /1976-06-10. №115/.
Орон нутагтаа мал маллан аж төрж байгаад 1945-1950 онд цэргийн алба хаажээ. 1950-1974 онд Улаанбаатар хотын төв цахилгаан станцын уурын турбиний засварчин, бригадын даргаар 24 жил ажиллаад 1974 оноос нийслэлийн цахилгаан станцуудын дулааны үндсэн, туслах тоноглолуудыг засварлах нэгдсэн засварын газрыг байгуулахад засварын бригадын даргаар шилжин очиж нас бартлаа ажиллажээ. Улсад 28 жил хөдөлмөрлөхдөө уурын турбин засварын нарийн мэргэжил эзэмшиж, уурын турбиний нарийвч зүйлийг шинээр хийх, сэргээн засварлах, дулааны тоноглолыг өөрчлөн сайжруулах зэргээр улсад 1,5 сая гаруй төгрөгийн ашиг оруулж, мэргэжилдээ 31 хүнийг дагалдуулан сургасан байна. Сүхбаатарын одон, “Алтан гадас” одонгоор хоёр удаа, Ардын хувьсгалын ойн хүндэт медалиуд, Засгийн газрын Хүндэт жуух бичиг, “Улсын ударник” цол, тэмдгээр шагнагджээ.