Меню

/1953/. Төв аймгийн Баянзүрх сум. “Ган гүүр “ ХХК-ийн даамал байхдаа Монгол Улсын Хөдөлмөрийн баатар /2005-07-08. №04/.
    1987 онд ТИС-ийг Барилга зам гүүрийн машин төхөөрөмжийн механик инженер мэргэжлээр төгсчээ. 1968 оноос Гүүр барилгын контор, “Ган гүүр” ХХК-д бетон арматурчин, угсрагч, мужаан, бригадын дарга, мастер, даамлаар ажиллаж буй ажээ. Ажиллах хугацаандаа 33 төмөр бетон гүүр, 7 модон гүүр, 8 зам талбай, 2 тоног төхөөрөмжийн угсралтын ажлыг хариуцан бариулж ашиглалтад өгсний дийлэнх хувийг онц, онцсайн дүнтэй хүлээлгэн өгчээ. Энэ хугацаанд ажилдаа 13 тэргүүн туршлага, дэвшилтэт арга барил нэвтрүүлсэн байна. Сүүлийн таван жилд ОХУ, Монгол Улсын хил худалдааны болон мянганы замын босоо чиглэлийн чухал боомт болох Тэшиг сумын Эгийн голын 289,4 уртааш метр төмөр бетон гүүрийг хугацаанаас нь 10 сарын өмнө барьж ашиглалтад онцсайн дүнтэйгээр өгчээ. Энэ мэтчилэн Булган аймгийн Хануйн голын гүүр, УБ-Дархан-АБ чиглэлийн бүх гүүр хоолойн засвар зэрэг ажлыг гүйцэтгэж 4 жилд жил бүр 391,4-802,9 сая төгрөгийн орлого олж, 12,5-162,9 сая төгрөгийн ашигтай ажиллажээ. Түүний удирдсан хамт олон “Мянганы зам”-ын хөрөнгө оруулалтад 500 мян.төг хандивласан байна. Сүхбаатарын одон, Хөдөлмөрийн гавьяаны улаан тугийн одон, Хөдөлмөрийн хүндэт медалиар тус тус шагнагджээ.