Меню

./1895-1952/. Цэцэн хан аймгийн Ачит вангийн хошуу, одоогийн Дорнод аймгийн Чойбалсан суман нутаг Хэрлэн Цагаан талбай гэдэг газар төржээ. БНМАУ-ын Сайд нарын Зөвлөлийн Ерөнхий сайд, Цэрэг, гадаад явдлын яамны сайд, Зэвсэгт хүчний жанжин байхдаа Монгол Улсын хошой баатар /1941-07-10. №44, 1945-09-20. №77/.
1919 онд Нийслэл хүрээний Консулын дэнжийн нууц бүлгэмийн гишүүн болж хувьсгалын үйл хэргээ эхэлж, 1920 онд Зөвлөлт Орос улстай холбоо тогтоож тусламж авахаар одсон долоон хувьсгалчийн нэг. 1921 оны Ардын хувьсгалын үйл хэрэгт идэвхтэй оролцсон баруун замын байлдааныг удирдагчдын нэг ажээ. 1921-1928 онд Бүх цэргийн дэд жанжин, Цэргийн зөвлөлийн гишүүн, цэргийн жанжин, 1928-1930 онд Гадаад явдлын яамны сайд, 1931-1935 онд Мал, тариалангийн яамны сайд, 1935 оноос Ардын Сайд нарын Зөвлөлийн орлогч сайд, нэгдүгээр орлогч сайд, Цэргийн явдлын яамны сайд, Дотоод явдлын яамны сайд, Гадаад яамны сайдаар ажилласан. 1939 онд Ардын сайд нарын Зөвлөлийн Ерөнхий сайдаар томилогдож нас бартлаа ажилласан нам, төр, цэргийн нэрт зүтгэлтэн байлаа. Монгол Улсын тусгаар тогтнолыг тууштай хамгаалж улс орныг хөгжүүлэх, бэхжүүлэх үйл хэрэгт их хувь нэмэр оруулсан гавьяатай ч нам, төрийн голлох удирдлагыг гартаа авч нэг хүний тахин шүтэх, захиран тушаах дэглэм тогтоон толгойлж, хувьсгалын эсэргүү, гадаадын тагнуул гэдэг нэрээр гэмгүй олон мянган хүнийг хилс хэрэгт хэлмэгдүүлж улс төрийн алдаа завхрал гаргасан байна. Монгол Улс болон бусад улсын олон одон, медалиар шагнагджээ.